Ibi babisabwe kuri uyu wa Gatandatu tariki ya 7 Ukwakira 2017, ubwo hasozwaga icyumweru cy’ubumwe n’ubwiyunge mu gihugu hose, mu muhango wabereye muri IPRC Kigali.

 

Umuyobozi wungirije w’Akarere ka Kicukiro ushinzwe ubukungu, Mukunde Angelique yasabye aba banyamadini n’abanyamatorero gukomeza gusigasira ubumwe n’ubwiyunge bwagezweho kugira ngo u Rwanda rukomeze kuba igihugu kirangwa n’amahoro n’umutekano.

 

Yagize ati “ Ibyo twakuye muri iki cyumweru ni byinshi cyane kuko namwe murabizi ko ahantu henshi ku isi bidapfa koroha kubona abayisilamu n’abo badahuje imyemerere baganira bakanasenyera umugozi umwe kandi ibyo byo byonyine bigaragaza ko hari umusaruro byatanze. Abanyamadini barasabwa gukomeza gusigasira ubumwe n’ubwiyunge bumaze kugerwaho kugira ngo u Rwanda rukomeze kuba igihugu kirangwa n’amahoro n’umutekano.”

 

Imamu mu Karere ka Kicukiro, Sheikh Nsengiyumva Soulaimani nawe yavuze ko nk’abayisilamu bishimiye umusaruro bakuye muri iki cyumweru cy’ubumwe n’ubwiyunge kuko byatumye basabana na bagenzi babo mu gihe bitari bisanzwe.

 

Yagize ati “ Nk’abayisilamu navuga ko iyi gahunda yadufashije kuba hamwe by’umwihariko amadini kuko ntibyari bisanzwe ko abanyamadini bashobora kuba bahura gutya kandi muribuka ko no mu minsi ishinze twanahuye dusengera amatora, rero kuba twongeye guhura twizihiza gahunda nk’iyi; sinabura kuvuga ko byatanze umusaruro ufatika.”

 

Uretse aba banyamadini bemeza ko bungukiye byinshi muri iki cyumweru n’abaturage bo muri aka karere bavuga ko bishimira gahunda nk’iyi kubera ko inyigisho bayikuramo.

 

Mukakamana Angelique yemeza ko mu cyumweru cy’ubumwe n’ubwiyunge yungukiramo byinshi.

Yagize ati “Iki cyumweru gitanga umusaruro kuko byonyine guhura n’abantu batandukanye barimo abahuye n’ibibazo ukabona murahuje biba nabyo ari umusaruro kuko akenshi iyo uri wenyine hari ubwo wibaza ko ari wowe ufite ibibazo byinshi gusa ariko iyo muhuye binagufasha kwishakamo ibisubizo.”

 

Muri iki cyumweru cy’ubumwe n’ubwiyunge mu Karere ka Kicukiro hakozwe ibikorwa bitandukanye birimo ibiganiro n’imikino birimo inyigisho z’ubumwe n’ubwiyunge.