Urubyiruko rw’Akarere ka Kicukiro ruravuga ko rugiye gukora uko rushoboye rugafasha ubuyobozi bw’Akarere kwesa neza imihigo kahize muri uyu mwaka w’ingengo y’imari wa 2018-2019.

Ibi ni ibyatangarijwe mu igikorwa cyo gusinya imihigo y’inama y’igihugu y’urubyiruko 2018-2019 no guhigura imihigo ya 2017-2018 cyahuje ubuyobozi bw’Akarere n’abahagarariye urubyiruko mu Mirenge igize Akarere ka Kicukiro.

 

Ni igikorwa cyabanjirijwe no kwerekana uko urubyiruko rwashyize mu bikorwa imihigo ya 2017-2018 mu Mirenge nyuma y’isuzuma ryakozwe hagamijwe kureba uko Imirenge yarushanijwe mu kwesa neza imihigo y’urubyiruko rwari rwiyemeje kugeraho.

 

Kuba iyi mihigo yarashyizwe mu bikorwa neza ku rwego rw’Akarere byatumye Inama y’igihugu y’urubyiruko ku rwego rw’Akarere ka Kicukiro yegukana umwanya wa kabiri ku rwego rw’igihugu. Ibi biri mu byo uru rubyiruko rwishimira ko rwagezeho rukaba rwamurikiye ku mugaragaro Ubuyobozi bw’Akarere igikombe ruherutse kwegukana ku rwego rw’igihugu nyuma yo kwesa neza imihigo y’urubyiruko.

 

Mu guhigura ku rwego rw’Imirenge, Umurenge wa Gahanga ni wo waje ku isonga mu kwesa neza iyi mihigo n’amanota 89%, Umurenge wa Masaka uza ku mwanya wa kabiri n’amanota 87% ku mwanya gatatu haza Umurenge wa Gatenga n’amanota 86,5% mu gihe Umurenge wa Gikondo waje ku mwanya wa yyuma n’amanota 69%.

Imirenge itatu yahize indi mu kwesa neza imihigo yashimiwe mu ruhame ihabwa ibimenyetso by’ishimwe by’umwihariko Umurenge waje ku isonga uhabwa n’ igikombe.

Uko urubyiruko mu Mirenge y’Akarere ka Kicukiro rwakurikiranye mu kwesa imihigo y’Urubyiruko 2017-2018

1.         GAHANGA  : 89%

2.         MASAKA :    87%

3.         GATENGA : 86.5%

4.         KANOMBE : 86%

5.         KICUKIRO  : 85.75%

6.         NYARUGUNGA : 85.5%

7.         NIBOYE   : 85%

8.         KIGARAMA : 83.5

9.         KAGARAMA : 78.5%

10.       GIKONDO : 64

Nkuko byasobanuwe n’Umuhuzabikorwa w’inama y’igihugu y’urubyiruko ku rwego rw’Akarere ka Kicukiro Bwana Irenee Niyitanga, urubyiruko rwarangije neza imihigo rwiyemeje, rugakorera hamwe nk’ikipe kandi rukanitabira gahunda zase za Leta ni rwo rwaje mu myanya y’imbere.

Yasabye urubyiruko gukomeza kugira uruhare rugaragara muri gahunda zose za Leta rukanafasha Akarere ka Kicukiro kwesa neza imihigo kahize. Ati “Turifuza ko twe nk’urubyiruko duhaguruka tugafasha Akarere kwesa imihigo. Imbaraga turazifite igisigaye ni ubushake kandi birashoboka”.

 

Nyuma yo gushyira umukono ku mihigo y’urubyiruko, Umuyobozi w’Akarere ka Kicukiro Dr. Nyirahabimana Jeanne yashimiye uru rubyiruko umwanya mwiza rwabonye mu kwesa neza imihigo ku rwego rw’igihugu. Yarusabye kudasubira inyuma ahubwo rugashyira imbaraga mu byo rukora kugira ngo bikomeze bigire impinduka nziza ku baturage.

Yagize ati “mwabonye umwanya mwiza twese turishimye. Ibyo mukora byose mukwiye kubinoza kugira ngo bigire impinduka nziza kuri bagenzi banyu n’abaturage muri rusange.

 

Imihigo urubyiruko  rw’Akarere ka Kicukiro rwahize muri uyu mwaka irimo gukangurira urubyiruko kwishyira mu matsinda aruteza imbere, gutegura no kwitabira amarushanwa agamije gukangurira urubyiruko gukunda igihugu, gukora siporo rusange mu rwego rwo kugira ubuzima bwiza, gukangurira urubyiruko kugira ubwisungane mu kwivuza, kwitabira umuganda n’ibindi.