Ibi ni ibyagarutsweho kuri uyu wa Kane, mu nama yahuje Ubuyobozi bw’Akarere, Ihuriro ry’Imiryango y’abafite ubumuga mu Rwanda “NUDOR” ndetse na ba Rwiyemezamirimo bakorera mu Karere ka Kicukiro.

Iyi nama yari igamije kurebera hamwe ibyagezweho mu rwego rwo kubaka ubushobozi bw’abafite ubumuga ndetse n’uruhare rw’abikorera mu gutanga umusanzu mu iterambere ry’abafite ubumuga.

Umuyobozi w’ishami ry’ubuzima n’iterambere ry’imibereho myiza mu Karere ka Kicukiro, Karungi Rebecca yagize ati: “ Muri iki gihe birakwiye ko abantu bose bahindura imyumvire tukumva ko abafite ubumuga bafite ubwenge bakagira n’impano zitandukanye zikeneye kubyazwa umusaruro, nk’Akarere tugira uruhare mu kububakira ubushobozi dufatanyije n’abafatanyabikorwa kuko nk’uko mubibona abitabiriye iyi nama bafite imishinga itandukanye bakora yibanda ku myuga itandukanye bize, iki rero ni ikimenyetso cy’uko bashoboye, turasaba ba Rwiyemezamirimo mu ngeri zitandukanye kubegera bakabyaza umusasuro impano n’ubumenyi bafite”.

Muri iyi nama abafite ubumuga bagaragaje ibikorwa bakora birimo ibishingiye ku myuga bakora nk’ubuhinzi bugezweho, ubudozi n’ububoshyi, abakora inkweto zigezweho, Serivisi z'ubwiza, Serivisi z’ikoranabuhanga n’ibindi bitandukanye.