Ibi byagarutsweho kuri iki Cyumweru tariki 11 Gicurasi 2025 ,mu mahugurwa y’abagize Komite za “Pan African Movement” baherutse gutorwa kuva mu Karere kugera mu Tugari ndetse na Kaminuza.

Aya mahugurwa kandi yitabiriwe n’Umuyobozi Nshingwabikorwa w’Akarere ka Kicukiro wungirije Huss Monique ndetse na  Amb. William Nkurunziza.

Muri aya mahugurwa abitabiriye bibukijwe ko Ukwigira kwa Afurika kuzaturuka mu maboko y’abana bayo, kuko Ibihugu byakoronije Afurika bidashaka ko itera imbere ngo ibashe kwikemurira ibibazo, ibi bikaba ariyo mpamvu y’intambara z’urudaca zihora mu mugabane wa Afurika.

Bagaragarijwe ko buri wese mu mwanya arimo iyo akoze ibyiza atanga Serivisi nziza ku baturage, akirinda ruswa, icyenewabo , ivangura n’izindi ngeso mbi aba ashyigikira igitekerezo cya “Pan Africanism” cyo Kubaka Afurika yishoboye kandi itekanye, ibi bikazafasha mu gukura Afurika ku guhora iteze amaboko ku nkunga z’amahanga.