Kuri uyu wa Kabiri tariki ya 23 Nyakanga 2024, Minisitiri w’uburezi Gaspard Twagirayezu yatangije ibizamini bya Leta bisoza icyiciro cya mbere cy’amashuri yisumbuye . Iki gikorwa kikaba cyabereye ku ishuri rya “GS Remera Protestant” riherereye mu Murenge wa Kanombe .

Bamwe mu banyeshuri baje gukorera ibizamini kuri iri shuri  bavuga ko babonye umwanya wo kwitegura neza ibizamini bya Leta  bakemeza ko nta kabuza bazabitsinda neza. Bavuga ko abarimu babo babafashije gusubiramo amasomo ndetse ababyeyi babo bababaye hafi muri uru rugendo rwo kwitegura ibizamini.

Minisitiri w’uburezi  Gaspard Twagirayezu yavuze ko imyiteguro y’ibizamini yagenze neza ndetse agaruka ku banyeshuri ba mbere bize muri gahunda y’abafasha b’abaforomo bagiye gukora ibizamini ku nshuro ya mbere ati: “ Nk’uko mubizi ubushize hari hatangiye abo mu mashuri abanza, hanyuma uno munsi abanyeshuri bari butangire ibizamini ni abarangije mu cyiciro cya mbere cy’ayisumbuye ndetse n’ibindi byiciro. Uyu mwaka rero igishyashya dufite ni uko hari gahunda yatangiye yitwa “Associate Nursing Program” yatangiye,  uyu munsi abanyeshuri ba mbere akaba aribwo bari bukore ikizamini cyanditse”.

Mu Karere ka Kicukiro hari ibigo bigera kuri 31 birimo gukorerwamo ibizamini bisoza amashuri yisumbuye, abasoza icyiciro cya mbere ni 3374, Abasoza icyiciro cya kabiri ni 1641 ndetse n’abagera ku 2162 basoza amashuri y’ubumenyingiro.

Umuyobozi w'Umujyi wa Kigali Samuel Dusengiyumva atanga urupapuro rw'ikizamini

Umuyobozi w'Umujyi wa Kigali Samuel Dusengiyumva yabanje kuganiriza abanyeshuri abifuriza gutsinda ibizamini

Umuyobozi Nshingwabikorwa w'Akarere wungirije Huss Monique nawe yaganirije abanyeshuri