Ubwo Umuyobozi Nshingwabikorwa w’Akarere ka Kicukiro MUTSINZI Antoine yahuraga n’abaturage b’Akagari ka Rusheshe mu Murenge wa Masaka kuri uyu wa Kabiri yabibukije ko kimwe mu bintu bidindiza iterambere ry’Igihugu ndetse n’abaturage ubwabo ari imyubakire itemewe “Akajagari” abasaba kubyirinda kuko bahuriramo n’ibihombo.

Umurenge wa Masaka kimwe no mu bindi bice bitandukanye by’Umujyi wa Kigali hari abaturage bakigaragaraho kurenga ku mabwiriza y’imyubakire bityo bakubaka nta byangombwa ndetse hakaba n’abubaka ibitandukanye n’ibikubiye mu byangombwa bahawe, ibi byose biteza igihombo ku babikora kuko inyubako yubatse muri ubu buryo ikurwaho.

Umuyobozi Nshingwabikorwa w’Akarere ka Kicukiro MUTSINZI Antoine aganira n’aba baturage yagize ati: “Iyo tuvuze imyubakire y’akajagari harimo ibintu bitandukanye, hari ukubaka udafite ibyangombwa, kubaka ahatemewe, kunyuranya n’uruhushya rwo kubaka wahawe ndetse n’ibindi bikorwa binyuranye n’igishushanyombonera cy’Umujyi wa Kigali, ibi rero birahanirwa ndetse bigateza igihombo ubikora kuko inyubako yubatse muri ubwo buryo ikurwaho”.

Yabibukije ko amabwiriza y’imyubakire asobanutse , abasaba kwirinda ababashuka ngo bazabaha ibyangombwa kuko Urwego rufite ububasha bwo gutanga ibyangombwa byo Kubaka ari Umujyi wa Kigali gusa.

Abaturage b'Akagari ka Rusheshe bakurikiye impanuro z'Umuyobozi Nshingwabikorwa w'Akarere banatanga ibitekerezo