Ibi byagarutsweho kuri uyu wa Kabiri tariki 09 Ukuboza 2025, mu nama Nyunguranabitekerezo yahuje Abayobozi mu nzego zitandukanye kuva kuri Mudugudu  kugera ku rwego  rw’Akarere, iyi nama yari igamije kurebera hamwe ibimaze kugerwaho mu guteza imbere Imiyoborere myiza, umutekano, ubukungu, imibereho myiza, ibikorwa remezo ndetse no gufata ingamba ku mbogamizi zikigaragara.

Umuyobozi Nshingwabikorwa w’Akarere MUTSINZI Antoine atangiza iyi nama yibukije abitabiriye kunoza Serivisi by’umwihariko bagaharanira ko imvugo “Umuturage ku isonga” iva mu magambo ikajya mu bikorwa.

Yagize ati “Iyo turebye ishusho rusange y’Akarere kacu, tubona ko hari urwego tumaze gutera mu miyoborere, Ubukungu, Ibikorwaremezo ndetse n’imibereho myiza gusa haracyari imbogamizi kuko hari ahakigaragara abaturage bakennye, gusa muzi ko Ubuyobozi bukuru bw’Igihugu cyacu bwadushyiriyeho uburyo bwo gufasha abaturage kwikura mu bukene mu buryo burambye kandi rwose iyi gahunda irimo kugenda neza dufatanyije n’abafatanyabikorwa b’Akarere”.

Umuyobozi Nshingwabikorwa w’Akarere ka Kicukiro yashimye kandi uruhare ba Mudugudu n’Abajyanama bagize mu bukangurambaga bwatumye abaturage bishakamo ibisubizo , atanga urugero rw’imihanda migenderano irimo kubakwa hirya no hino mu Midugudu yiyubakirwa n’abaturage ku kigero cya 100%. 

Ubushashashatsi buheruka gukorwa n’Ikigo cy’Igihugu cy’Imiyoborere (Citizen Report Card (CRC) 2025) bugaragaza ko mu  Karere ka Kicukiro , igipimo cy’imiyoborere n’imitangire ya Serivisi kiri kuri 79.57%.

Ubu bushakashatsi kandi bushyira Akarere ka Kicukiro ku mwanya wa mbere ku rwego rw’Igihugu mu guteza imbere Isuku, Imibereho y’umuryango Nyarwanda,Urwego rw’abikorera, Uburezi, Ababona amazi meza aho batuye,Serivisi zitangwa n’inzego z’ibanze ndetse  n’ibikorwaremezo.

Umuyobozi w’Umujyi wa Kigali DUSENGIYUMVA Samuel wari umushyitsi mukuru yibukije abitabiriye iyi nama gushyira imbaraga mu gukangurira abaturage gahunda za Leta , agaruka kuri gahunda zirimo gukorwa mu Mujyi wa Kigali nko gutera ibiti ndetse n’isuku aho abantu batuye, aho bakorera ndetse no ku mihanda, ibi avuga ko bihera ku muyobozi bikagera ku muturage. 

Yanasabye abayobozi bitabiriye iyi nama gusobanurira abaturage ko kubaka akajagari bitemewe kandi bitera igihombo ubikoze, avuga kandi ko abayobozi bagira uruhare mu myubakire y’akajagari bazajya bakurikiranwa n’amategeko. 

Muri iyi nama kandi abayobozi b’Imidugudu basabwe  kwita cyane ku ikoreshwa ry’ikaye y’umutekano, ingo zose zituye Imidugudu zikandikwa, abashyitsi batuye Umudugudu bakandikwa kugira ngo hakurikiranwe umutekano mu Mudugudu bishingiye ku ikaye y’Umudugudu. 

Umuyobozi w'Umujyi wa Kigali DUSENGIYUMVA Samuel aganiriza abitabiriye Inama Nyunguranabitekerezo

Umuyobozi Nshingwabikorwa w'Akarere MUTSINZI Antoine aganiriza abitabiriye Inama Nyunguranabitekerezo