Kuri uyu wa Gatanu tariki ya 01 Kanama 2025, mu Karere ka Kicukiro hizihijwe Umuganura aho ku rwego rw’Akarere ibirori byabereye mu Murenge wa Nyarugunga , Akagari ka Rwimbogo. 

Iki gikorwa kikaba cyanitabiriwe n’Umuyobozi w’Umujyi wa Kigali wungirije ushinzwe ubukungu n’imibereho myiza, URUJENI Martine ndetse n’Umuyobozi Nshingwabikorwa w’Akarere ka Kicukiro, MUTSINZI Antoine aho banayoboye umuhango wo gutaha Irerero ryubatswe n’abaturage mu Mudugudu wa Nyandungu.

Mu kwizihiza Umuganura mu Karere ka Kicukiro hanatashywe ibikorwa by’iterambere byubatswe n’Ubuyobozi ndetse n’abaturage, aha Umuyobozi Nshingwabikorwa w’Akarere akaba yashimiye abaturage mu Mirenge yose  bashyize hamwe ubushobozi bakiyubakira ibikorwa remezo.

Umuyobozi w’Umujyi wa Kigali wungirije ushinzwe ubukungu n’imibereho myiza yavuze ko Umuganura ari umwanya mwiza wo kwishimira umusaruro w’ibyagezweho no guha agaciro imirimo yakozwe n’Abanyarwanda mu nzego zitandukanye: Ubuhinzi, Ubworozi, Uburezi, Ubucuruzi, n’izindi nzego zose zituma Igihugu cyacu gitera imbere. Yagize ati: “Umuganura uratwibutsa ko ubumwe bwacu ari ryo shingiro ry’iterambere, Ubwumvikane mu miryango, mu Midugudu mu mashyirahamwe, mu bucuruzi,…ni wo muti w’ibibazo byinshi duhura na byo.”

Insanganyamatsiko y’Umuganura mu mwaka wa 2025 ikaba igira iti: "Umuganura, isoko y'ubumwe n'ishingiro ryo kwigira."