Kuri uyu wa Gatatu tariki 26 Werurwe 2025, imiryango 6 yo mu Murenge wa Gahanga yorojwe inka muri gahunda ya “Girinka” aborojwe bakaba biyemeje kuzifata neza kugira ngo zibafashe guhindura imibereho ndetse bazabashe kwitura.

Igikorwa cyo koroza iyi miryango cyagezweho ku bufatanye bw’Akarere n’umuryango ADEF (Africa Development and Education Foundation), Umuyobozi w’ishami ry’iterambere ry’ubukungu mu Karere wari uhagarariye Ubuyobozi bw’Akarere ka Kicukiro muri iki gikorwa MUKAMASABO Donatha, yashimye uruhare rw’abafatanyabikorwa muri gahunda zigamije guhindura imibereho y’abaturage , asaba aborojwe gufata neza inka borojwe kandi ko ubuyobozi buzakomeza kubaba hafi ati “Mu muco wacu iyo umuntu aguhaye inka aba aguhaye byose, dushimiye abafatanyabikorwa bacu “ADEF” ku gitekerezo bagize cyo koroza abaturage batishoboye kugira ngo bashobore kwikura mu bukene, turabasaba ko izi nka muzorora neza ndetse twiteguye kubona mworoza bagenzi banyu bityo nabo bagashobora kwiteza imbere”.

Muri uyu mwaka wa 2024-2025, mu Karere ka Kicukiro hamaze korozwa abaturage  64 muri gahunda ya “Girinka”, abaturage borojwe bakaba bagaragaza ko hari uruhare runini zimaze kugira mu guhindura imibereho yabo.