Kuri uyu wa Gatatu tariki 29 Ukwakira 2025, Umuyobozi Nshingwabikorwa w’Akarere ka Kicukiro MUTSINZI Antoine hamwe n’Umuyobozi Nshingwabikorwa w’Akarere ka Kicukiro wungirije HUSS Monique ndetse n’Umuyobozi w’imirimo rusange mu Karere MURENZI M. Donatien basuye abanyeshuri ku Ishuri rya GS Sabaganga mu Murenge wa Gatenga basangira ifunguro rya kumanywa.

Iki gikorwa cyakozwe ubwo aba bayobozi basuraga ishuri mu rwego rwo kureba imyigire y’abanyeshuri, isuku , ubwitabire bw’abanyeshuri ndetse n’uburyo gahunda yo gufatira ifunguro ku ishuri “School Feeding Program” yubahirizwa.

Iki gikorwa cyashimishije abanyeshuri bagaragazaga akanyamuneza ndetse bagaragaza ko bishimiye ubuyobozi bwiza bushishikajwe n’iterambere ry’uburezi, Umuyobozi Nshingwabikorwa w’Akarere ka Kicukiro MUTSINZI Antoine yasabye abanyeshuri kwiga bashyizeho umwete kuko bafite Ubuyobozi bubitayeho.

Yagize ati “ Bana bacu uyu munsi twaje kubasura ngo dusangire ifunguro ndetse tuganire ku myigire yanyu ndetse tumenye imbogamizi, mufite, iyi gahunda yo gufatira ifunguro ku ishuri twayigejejweho n’Ubuyobozi bw’Igihugu cyacu bufite icyerekezo kiza cyo guteza imbere uburezi, murabizi ko umuntu utarize ntacyo yageraho mu buzima niyo mpamvu twifuza ko nta mwana ugomba kuva mu ishuri kandi n’uwagira ikibazo gituma ashobora gusiba ishuri cyangwa kurivamo yajya yegera abarimu ndetse n’abayobozi akatubwira ikibazo afite tukamufasha”.

Ubuyobozi bw’Ishuri rya GS Sabaganga kandi bwasabwe gushyira imbaraga mu kuzamura ireme ry’uburezi , isuku ndetse no gukurikirana ko nta bana bata Ishuri.