Ku mugoroba wo kuri iki cyumweru tariki 18 Gicurasi 2025, mu cyumba cy'inama cy'Akarere ka Kicukiro habereye Umugoroba w'Umuryango wahujwe n'Umunsi Mpuzamahanga w'Umuryango usanzwe wizihizwa tariki 15 Gicurasi buri mwaka. Insanganyamatsiko y'umunsi mpuzamahanga w'umuryango igira iti : “Ibiganiro byiza, ireme ry'umuryango”.

Uyu mugoroba w'umuryango witabiriwe n’Umuyobozi w’Ikigo cy'Igihugu Gishinzwe Imikurire no Kurengera Umwana (NCDA) Assoumpta Ingabire,Umunyamabanga Nshingwabikorwa w'Inama y'Igihugu y'Abagore, Umubyeyi Marie Mediatrice, Umuyobozi Nshingwabikorwa w'Akarere ka Kicukiro Wungirije Huss Monique ndetse n’Umuyobozi Wungirije w’ikigo gishinzwe kugenzura no gushyira mu bikorwa ihame ry'uburingare (GMO) ushinzwe kurwanya ihohoterwa rishingiye ku gitsina, Muhongerwa Agnes.

Abitabiriye beretswe kandi ikinamico igamije gusobanurira imiryango uburyo bwiza bwo kubaka umuryango ushoboye kandi utekanye, himakazwa ibiganiro mu muryango. Ibiganiro byatanzwe bikaba byari bifite intero igira iti: “Twubake Umuryango urangwa n'indangagaciro z'Umuco Nyarwanda”.