Kuri uyu wa Gatanu traiki 20 Kamena 2025, nibwo ku Cyicaro cy’Akarere ka Kicukiro hasojwe Imurikabikorwa mu iterambere ry’Akarere ka Kicukiro, iri murikabikorwa rikaba ryari rimaze iminsi ibiri.

Iri murikabikorwa ryari rifite Insanganyamatsiko igira iti: Umufatanyabikorwa mu iterambere ry’ikoranabuhanga”. Ni imurikabikorwa ryitabiriwe n’abafatanyabikorwa b’Akarere bagera kuri 66 biganjemo imiryango ndetse n’ibigo bikorera mu Karere, Inganda ndetse n’abahagarariye imishinga itandukanye.

Bimwe mu bikorwa byamuritswe harimo : Serivisi zitangwa n’Ubuyobozi bw’Akarere by’umwihariko Serivisi z’imicungire n’imitunganyirize y’ubutaka, Serivisi za Ejo Heza ndetse n’imikorere ya Sisiteme Imibereho aho abaturage bakoresha Telefoni *195# bakamenya amakuru y’urugo ndetse bakaba banishyura Mituweli.

Umuyobozi wungirije w’Ihuriro ry’Abafatanyabikorwa mu Iterambere ry’Akarere ka Kicukiro MUSUHUKE Benjamin, mu ijambo rye yagaragaje imikoranire myiza iri hagati y’ubuyobozi bw’Akarere n’abafatanyabikorwa agaragaza ko ubu bufatanye bukomeje gutanga umusaruro mu iterambere by’umwihariko mu bikorwa byo kurwanya igwingira n’imirire mibi, Guteza imbere uburezi, Kurwanya indwara z’ibyorezo, Guteza imbere imyuga  ndetse no guteza imbere isuku n’isukura.

Umuyobozi Nshingwabikorwa w’Akarere MUTSINZI Antoine yagarutse ku nsanganyamatsiko y’iri murikabikorwa avuga ko kwimakaza ikoranabuhanga byatanze umusaruro hanozwa imikoranire y’Ubuyobozi bw’Akarere , Abafatanyabikorwa ndetse n’abaturage ati: “Muri iki gihe turishimira ko twubatse ikoranabuhanga rihuriweho ridufasha kunoza imikoranire, dufite urubuga cyangwa “Sisiteme” ifasha kumenya ibikorwa bikenewe gushyirwamo imbaraga, abafatanyabikorwa bazabigiramo uruhare ndetse no kubikurikirana bikaba byoroshye kuko buri wese uba ukoresha urubuga aba abibona mu ikoranabuhanga, ibi rero bimaze gutanga umusaruro ugaragara". 

Mu gusoza imurikabikorwa  kandi hakaba hatanzwe ibihembo ku bafatanyabikorwa ndetse n’abakozi babaye indashyikirwa mu  bikorwa bitandukanye, Umurenge wa Nyarugunga ukaba ari wo wahawe igihembo nk’Urwego rwabaye Indashyikirwa mu guteza imbere Imiyoborere myiza. 

Umuyobozi Nshingwabikorwa w'Akarere MUTSINZI Antoine yashimye uruhare rw'Abafatanyabikorwa b'Akarere mu iterambere

Umurenge wa Nyarugunga wahawe igihembo cy'Indashyikirwa mu miyoborere

Abafatanyabikorwa b'Akarere basobanuye ibikorwa baje kumurika