Kuri iki cyumweru tariki 29 Ukuboza 2024, nibwo mu karere ka Kicukiro hasojwe  Itorero ribanziriza Urugerero rw’Inkomezabigwi icyiciro cya 12, ryitabiriwe n’urubyiruko rw’abanyeshuri basoje amashuri yisumbuye mu mwaka w’amashuri wa 2023/2024.

Iri torero ryatangijwe ku mugaragaro Kuva ku wa 27 Ukuboza 2024, abitabiriye bakaba baratojwe hakoreshejwe uburyo bw'ibiganiro n'imikoro ngiro, bifasha urubyiruko gusobanukirwa amateka y’u Rwanda n’aya Jenoside yakorewe Abatutsi by’umwihariko, Icyerekezo 2050, uruhare rw’urubyiruko mu kuzuza nshingano mboneragihugu no gusigasira Ubunyarwanda.

Mu gitaramo cy'imihigo y'Inkomezabigwi cyabereye mu Murenge wa Nyarugunga , ahari kimwe mu byanya bine byatorejweho,  Umuyobozi Nshingwabikorwa muri MINUBUMWE ushinzwe Itorero no guteza imbere Umuco Madamu UWACU Julienne yibukije intore akamaro k’itorero ati :” "Itorero ni irerero ry'Igihugu, ribafasha kumenya mu buryo bwagutse Igihugu cyanyu, mukamenya indangagaciro z'Abanyarwanda ndetse n'icyerekezo cy'Igihugu; itorero kandi ribigisha gufatanya muri byose mukabasha kugera ku byo mwifuza byose”.