Kuri uyu wa mbere tariki 21 Nyakanga 2025, mu Murenge wa Kanombe hatangijwe ubukangurambaga bw’iminsi 12 bwo kurwanya imirire mibi mu bana bato by’umwihariko hagamijwe kondora abakiri mu mirire mibi.

Mu gutangiza iki gikorwa abana 49 bagaragara mu mirire mibi bagaburiwe indyo yuzuye ndetse ababyeyi babo bigishwa gutegura indyo yuzuye mu miryango yabo ndetse banerekwa ko ibikenewe mu gutegura indyo yuzuye bidahenze, ibindi bakaba babitegura batabikuye ku isoko aha harimo nk’imboga bashobora guhinga mu turima tw’igikoni .

Umunyamabanga Nshingwabikorwa w’Umurenge wa Kanombe NKURUNZIZA Idrissa atangiza ubu bukangurambaga yagize ati: “ Uyu munsi twatangiye ubukangurambaga bwo kurwanya imirire mibi mu bana bato kuko umwana ni we ejo hazaza h’Igihugu, iyo rero agwingiye Igihugu kiba gihombye kuko ntabwo umuntu wagwingiye yavamo umuyobozi mwiza cyangwa se ngo ashobore kwiteza imbere mu buryo bworoshye kuko aba yarangiritse akiri muto, tuributsa rero ababyeyi ko tujyanamo muri iyi gahunda by’umwihariko ababyeyi bagahabwa ubumenyi bwo gutegura indyo yuzuye”.

Uretse kwigishwa gutegura indyo yuzuye, ababyeyi basabwe guha abana babo uburere bwiza n’indangagaciro z’umuco Nyarwanda.