Kuri uyu wa Kabiri tariki  27 Mutarama 2026, mu Murenge wa Masaka mu Karere ka Kicukiro, habereye umuhango wo gutangiza ku mugaragaro urubuga  rwitwa “MBAZA”, rugamije korohereza abaturage kwegera inzego z'ibanze mu kugaragaza ibibazo , gutanga amakuru ndetse rukanakoreshwa mu gukemura ibibazo biba byagaragajwe n’abaturage.

Umuhango wo gutangiza uru rubuga, witabiriwe n’abayobozi batandukanye barimo Minisitiri w’Ikoranabuhanga no Guhanga Udushya Madamu  Ingabire Paula wari umushyitsi mukuru, Umuyobozi w’Umujyi wa Kigali wungirije ushinzwe imiturire n’ibikorwaremezo Bwana DUSABIMANA Fulgence ndetse n’Umuyobozi Nshingwabikorwa w’Akarere ka Kicukiro Bwana MUTSINZI Antoine.

Atangiza ku mugaragaro uru rubuga, Minisitiri Ingabire Paula yasobanuye ko Mbaza igamije gukuraho inzitizi zituma abaturage batinda kubona ibisubizo ku bibazo byabo, aho yagize ati “Intego nyamukuru ya “Mbaza” ni uko nta muturage uzongera gutegereza kujya mu nteko kugira ngo ikibazo afite gikemuke cyangwa gusiragira mu nzego ashaka uwamukemurira ikibazo. Ahubwo, mu gihe ufite Telefoni, ushobora kumenyekanisha ikibazo cyawe ukoresheje urubuga Mbaza.”

Yongeyeho ko uru rubuga ari igikoresho cy’ingenzi mu kunoza imitangire ya Serivisi no guteza imbere imiyoborere myiza hifashishijwe Ikoranabuhanga, aho inzego z'ibanze zizajya zikurikirana ibibazo byatanzwe ku gihe no mu mucyo.

Abaturage n’abayobozi b’inzego zibanze bitabiriye uyu muhango beretswe uko urubuga “Mbaza” rukoreshwa, banizezwa ko hazatangwa amahugurwa arambuye azafasha buri wese kurusobanukirwa no kurukoresha neza, bityo rugire uruhare rugaragara mu gukemura ibibazo by’abaturage.

Minisitiri INGABIRE Paula  hamwe n'Umuyobozi w’Umujyi wa Kigali wungirije ushinzwe imiturire n’ibikorwaremezo Bwana DUSABIMANA Fulgence ndetse n’Umuyobozi Nshingwabikorwa w’Akarere ka Kicukiro Bwana MUTSINZI Antoine baganira n'abaturage.