Kuri uyu wa 29 Kamena 2026, ku ishuri ribanza rya G.S. Gatenga I riherereye mu Murenge wa Gatenga, Akarere ka Kicukiro, hizihirijwe Umunsi w'Umwana w'Umunyafurika ku rwego rw'Akarere, aho Insanganyamatsiko igira iti "Ndera Neza, Nkure Nemye."

Uyu muhango witabiriwe n'Umuyobozi w’ishami ryUbuzima n’iterambere ry’mibereho myiza mu Karere ka Kicukiro, Madamu Karungi Rebecca, Abayobozi b'inzego z'ibanze, abahagarariye Amadini n'amatorero, Abayobozi b'ibigo by'amashuri, Abanyeshuri ndetse n'abafatanyabikorwa batandukanye bakorana n'Akarere mu guteza imbere uburenganzira n'imibereho myiza y'abana.

Muri ibi birori, abana bibukijwe uburenganzira bwabo n'inshingano bafite mu muryango no mu Gihugu, banashishikarizwa kurangwa n'Ikinyabupfura, imwe mu ndangagaciro z'umuco Nyarwanda.

Mu ijambo rye, Umuyobozi  w’shami ry’Ubuzima n’iterambere ry’mibereho myiza mu Karere ka Kicukiro, Madamu Karungi Rebecca, wavuze mu izina ry'Ubuyobozi bw'Akarere, yashimiye abafatanyabikorwa bose bagize uruhare mu gutegura no kwizihiza umunsi w'umwana w'Umunyafurika, ati “Dushimiye buri wese witabiriye uyu munsi by’umwihariko abafatanyabikorwa bacu bakomeje kudufasha guteza imbere imibereho myiza y’abana, aba bana ni bo hazaza h’Igihugu cyacu, dukomeze kububakamo ikizere n’ubushobozi kugira ngo bazagirire Igihugu cyacu akamaro”.

Abitabiriye uyu munsi basusurukijwe n'ibitaramo byateguwe n'abana birimo imbyino gakondo n'izigezweho, imivugo, ikinamico ndetse n'imigani itanga ubutumwa bwo kurengera no kurera neza umwana. Hanatanzwe ibihembo ku banyeshuri bitwaye neza kurusha abandi mu masomo, mu rwego rwo kubashimira no kubatera ishyaka ryo gukomeza kwitwara neza.