Ubuyobozi bw’Akarere ka Kicukiro bwibukije abaturage bose muri rusange kudahishira abakora ihohotera iryo ari ryose kuko kurihishira bigira ingaruka zikomeye z’ubuzima bwose ku barikorewe, imiryango yabo n’umuryango nyarwanda muri rusange.

Ibi abaturage babisabwe n’Umuyobozi Nshingwabikorwa wungirije w’Akarere ka Kicukiro mu gikorwa cyo gutangiza ku mugaragaro ubukangurambaga bw’iminsi 16 bugamije kurwanya ihohotera rishingiye ku gitsina hibandwa ku nsanganyamatsiko igira iti “Wicecceka, rwanya ihohotera rishingiye ku gitsina”

Ni ubukangurambaga bwabimburiwe n’urugendo rwo kwamagana ihohotera iryo ari ryo ryose rwahereye mu mahuriro y’imihanda ya Sonatubes rwerekeza ku Kigo gihugura abagore imyuga itandukanye (Kicukiro Women Training Center) mu Murenge wa Niboye.

Abitabiriye uru rugendo bari bitwaje ibyapa byamagana abakora ihohotera banitwaza indangururamajwi n’ibindi birango byose bitanga ubutumwa bwo kudahishira abahohotera abandi.

Bamwe mu bangavu baganiriye n’itangazamakuru bagaragaje ko hari bagenzi babo bazi bakorewe ihohotera ariko bitewe no kutamenya uburenganzira bwabo bagahitamo kubiceceka; banga ko ngo byamenyekana bagasekwa n’izindi mpamvu zirimo kutisanzura n’urungano rimwe na rimwe n’imiryango yabo ntibiteho uko bikwiye.

Bamwe muri bo bakomeza bavuga ko aho bigeze ubu nubwo abenshi mu rubyiruko bamaze gusobanukirwa byimbitse amoko y’ihohotera hakwiye gushyirwaho ubukangurambaga buhoraho ngo abantu barusheho gusobanukirwa neza n’ihohotera no kudahishira uwarikoze

Umwe muri bo witwa Aline Mukandekezi yagize ati “Twese ntidusobanukiwe kimwe ihohotera kandi hari abakigorwa no kugaragaza ko bahohotewe. Hakenewe rero ubukangurambaga nk’ubu buhoraho abantu bakigishwa byimbitse kandi nizeye ko bizatanga umusaruro kuko abahohotera abandi bazagabanuka n’abahohotewe n’abo bamenye uko bagaragaza ibyababayeho”.

Umuyobozi Nshingwabikorwa wungirije w’Akarere ka Kicukiro Rukebanuka Adalbert avuga ko nubwo ihohotera rihari ridakabije ariko icy’ibanze ni uko n’iribaye ritagomba gucecekwa.

Yagize ati “Mu karere ka Kicukiro kimwe n’ahandi mu gihugu ntabwo ihohotera rihari rikabije ariko ugira utya ukabona hari ikibazo cyavutse ariko niyo haba kimwe cyangwa bibiri iyo habaye ihohoterwa tuba twakomeretse; kiba ari ikibazo gikomeye duha uburemere. Turashishikariza abaturage bacu kudaceceka iryo hohotera kuko iyo umuntu ahohoteye umwana biba ari ukwangiza umuntu w’ejo hazaza".

Ubukangurambaga bwo kurwanya ihohoterwa bwatangijwe mu gihugu hose ku itariki ya 25 uku kwezi bukazasozwa ku itariki ya 10 Ukuboza uyu mwaka. Buzakorerwa mu Mirenge yose igize Akarere ka Kicukiro hakorwa ibikorwa bitandukanye ndetse hanatangwa ubutumwa bwo kwirinda ihohotera no kudahishira abarikora.