Kuri uyu wakabiri tariki ya 21 Nzeri 2021, mu Murenge wa Gahanga hatangijwe ku mugaragaro gahunda y’isanamitima yiswe “Kira Initiative” igamije komorana ibikomere, kubaka amahoro no gushimangira ubumwe n'ubwiyunge mu baturage.

Iyi gahunda yatangijwe ku mugaragaro mu birori byo kwizihiza Umunsi Mpuzamahanga w'amahoro ku rwego rw’Akarere ka Kicukiro ukaba wizihirijwe muri uyu Murenge mu Kagari ka Mulinja hibandwa ku nsanganyamatsiko igira iti "Duharanire amahoro arambye dufatanye gutsinda COVID19 n'ingaruka zayo n'ibindi byabangamira amahoro".

Ibirori byo kwizihiza uyu munsi byabimburiwe n’igikorwa cyo gutera igiti cy’amahoro n’ubwiyunge cyatewe muri Centre y’ubucuruzi ya Gahanga mu rwego rwo gukomeza kwibutsa abatuye n’abagenda muri uyu Murenge ko amahoro, ubumwe n’ubwiyunge ari byo shingiro ry’iterambere.

Nyuma yo gutera iki giti, abitabiriye ibi birori basuye iriba ry’amahoro ryubatswe mu Mudugudu wa Mulinja banasura ibikorwa bitandukanye umwe mu bafatanyabikorwa b’Akarere witwa “Gira Inzu developers” yakoze birimo gusana inzu z’abarokotse Jenoside yakorewe Abatutsi batuye muri uyu Mudugudu.

Mu kwizihizihiza uyu munsi mpuzamahanga w’amahoro, umwe bu baturage batuye muri uyu Murenge witwa Sibomana Hassad yahawe inka 2 zatanzwe n’abandi baturage mu rwego rwo kumushimira ku mugaragaro uruhare yagize kandi akomeje kugira mu bikorwa byimakaza Ubumwe n'Ubwiyunge muri uyu Murenge wa Gahanga.

Mu ijambo rye Sibomana yavuze ko gahunda ya “Kira Initiative” ije ikenewe kuko izafasha mu isanamitima no gufasha abantu gukira ibikomere by’ingaruka za Jenoside ndetse ikarushaho gushimangira ubumwe n’ubwiyunge bw’abatuye mu Murenge wa Gahanga.

Ubwo yatangizaga ku mugaragaro iyi gahunda, Umuyobozi Nshingwabikorwa w’Akarere ka Kicukiro yavuze iyi gahunda ya “Kira Initiative” ikwiye gufasha abantu kwiyunga biruseho ndetse ikagezwa n’ahandi mu yindi Mirenge.

Yasabye abatuye muri uyu Murenge kubana mu mahoro bagahuriza hamwe imbaraga mu kubaka no kwihutisha iterambere ry’aho batuye bityo nabo bagakomeza kugira uruhare mu cyerekezo cyiza cy’igihugu.

Yagize ati “Iyi gahunda muyigire inyanyu kandi ikomeze kubafasha mu kwishakamo ibisubizo byo kubaka amahoro mu bumwe n’ubwiyunge kuko ari byo bizabafasha kugera ku majyambere yose mwifuza”.

Iyi gahunda ya “Kira Initiative” ije ikurikira indi ikomeje yitwa “Imana ifasi” nayo yatangijwe muri uyu Murenge hagamijwe guhuriza hamwe abayobozi n’abaturage mu kwikemurira ibibazo byabo ku gihe no kwishakira ibisubizo by’ibibazo bafite.