Kuri uyu wa gatanu tariki ya 11-06-2021, Ubuyobozi bw’Umurenge wa Kanombe bwamurikiye ku mugaragaro abaturage bawutuye bimwe mu bikorwa by’amajyambere byakozwe mu mwaka w’ingengo y’imari wa 2020/2021.

Iki gikorwa cyabimburiwe no gusura bimwe mu bikorwaremezo byubatswe n'abaturage birimo imihanda ya Kaburimbo aba baturage biyubakiye binyuze mu kwishyira hamwe kwabo bakishakamo ibisubizo.

Ni igikorwa cyaranzwe no kuremera abacitse ku icumu rya Jenoside 12 baremewe ibikoresho bitandukanye birimo imashini zidoda, amafaranga agenewe igishoro mu bucuruzi n'ibindi bibafasha kwiteza imbere byose hamwe bifite agaciro k’amafaranga angana na 2,700,000Frw.

Muri iki gikorwa kandi hanabayeho gishimira ku mugaragaro Abafatanyabikorwa b'uyu Murenge ku ruhare bagira mu guteza imbere uyu Murenge n'uruhare rwabo mu gukomeza guhindura ubuzima n'imibereho by'abatuye Umurenge wa Kanombe.

Umunyamabanga Nshingwabikorwa w’agateganyo w’Umurenge wa Kanombe Mapambano Festo yagaragaje bimwe mu bikorwa by’ingenzi byagezweho.

Mu byagarutsweho harimo imihanda ireshya na kilometero 10 mu Kagari ka Rubirizi no mu tundi Tugari yose yubatswe n’abaturage binyuze mu kwishyira hamwe mu masibo.

Mu bindi bishimira ko byagezweho harimo ko muri uyu mwaka Uumurenge wa Kanombe wahaye inka imiryango 4 muri gahunda ya Gira inka Munyarwanda.

Mu kwita ku batishoboye hubatswe inzu 5 (Inzu 1 imwe itujwemo imiryango 2) yatujwemo imiryango 10.

Umwe mu baturage bahawe imashini yo kudoda n’amafaranga 180.000Frw yashimiye ubuyobozi bw’Umurenge bumufashije akongera kwiteza imbere nyuma y’aho ubucuruzi buciriritse yakoraga bwagizweho ingaruka n’icyorezo cya Covid-19 bugahagarara n’igishoro kikamushirana.

Yagize ati: “Icyo nishimira ni uko nagobotswe n’ubuyobozi, ibi binyereka ko mfite umubyeyi unyitaho ni yo mpamvu nanjye ngomba kugendana na gahunda za Leta kuko mbonye ko ari umubyeyi wita ku bana bayo”.

Umuyobozi Nshingwabikorwa w’Akarere ka Kicukiro, Umutesi Solange, wasuye ibikorwa remezo birimo imihanda abaturage biyubakiye yavuze ko gushyira hamwe biteza imbere umurenge.

Yagize ati: “Ubufatanye mu kugira icyerekezo kimwe bitugeza aheza. Gushyira hamwe kw’abaturage n’ubuyobozi biteza imbere Umurenge wa Kanombe. Abaturage mwagobotswe mukore mwiteze imbere kuko iyo ushaka gukora utera imbere”.

Umurenge wa Kanombe watanze bimwe mu bikoresho bizafasha abagizweho ingaruka n’icyorezo cya COVID-19, bimwe muri byo harimo imashini zidoda, igare n’amafaranga yamaze kugezwa kuri konti zabo.

Mu Ijambo yagejeje ku bitabiriye iki gikorwa Umuyobozi Nshingwabikorwa w'Akarere ka Kicukiro Umutesi Solange yashimiye abaturage n'abafatanyabikorwa b'uyu Murenge ku bikorwa by'indashyikirwa bagezeho abasaba gukomeza gukorera hamwe hagamijwe kwihutisha iterambere rirambye.

Muri iki gikorwa hanabayeho gutangiza ku mugaragaro ubukangurambaga bwa mitiweli bw'umwaka wa 2021/2021 aho ku ikibitiro umufatanyabikorwa Reach the Children Rwanda yishyuriye ubwisungane mu kwivuza abaturage 100 batishoboye.