Kuri uyu wa Gatatu tariki ya 08 Werurwe 2023,  Mu Mirenge yose igize Akarere ka Kicukiro abaturage bizihije umunsi mpuzamahanga w’Umugore .

Umunsi mpuzamahanga w’Umugore by’umwihariko ku rwego rw’Akarere wizihirijwe mu Murenge wa Kigarama ukaba witabiriwe n’Umuyobozi w'Umujyi wa Kigali wungirije ushinzwe imiturire n'ibikorwa remezo Dr. Merard MPABWANAMAGURU  ari nawe mushyitsi mukuru, Senateri Prof. NIYOMUGABO Cyprien , Umuyobozi Nshingwabikorwa w’Akarere Madamu UMUTESI Solange n’abandi bafatanyabikorwa b’Akarere .

Ni umunsi wasanze Abagore bo mu Karere ka Kicukiro by’umwihariko mu Murenge wa Kigarama bakataje mu bikorwa bibateza imbere byiganjemo imyuga nko gukora amasabune ,ubudozi , ububoshyi, ubugeni n’indi myuga itandukanye bagaragaza ko yagize uruhare mu iterambere ryabo.

 Gusa nk’uko byagarutsweho mu butumwa bw’abayobozi ,abagore basabwe guhuza akazi bakora n’ikoranabuhanga kuko muri iki gihe akazi kose gasaba ikoranabuhanga kugira ngo gatange umusaruro.

Umuyobozi Nshingwabikorwa w’Akarere Madamu UMUTESI Solange agaragaza ko mu Karere ka Kicukiro hamaze guterwa intambwe y’ingenzi mu gufasha abagore n’abakobwa kwiteza imbere mu ikoranabuhanga ati “Hashyizweho abantu mu karere bitwa “Digital Ambassadors” bigishije abaturage 3,343, abagabo 1,302 n’abagore 2041 gukoresha mudasobwa na telefoni bisabira serivisi zitangwa hifashishijwe ikoranabuhanga”. 

Avuga kandi ko mu  ka Kicukiro  hashyizweho ikigo ‘Kicukiro Women TVET Center’ cyigisha abagore batashoboye gukomeza amashuri n’abangavu babyariye mu rugo imyuga iciriritse y’igihe gito, izabafasha kwiteza imbere.

Mu bigo by’amashuri hakozwe ubukangurambaga bushishikariza abana b’abakobwa gutinyuka nka basaza babo bakiga siyansi n’ikoranabuhanga.

Umuyobozi Nshingwabikorwa w'Akarere Madamu UMUTESI Solange .

Umuyobozi w’Umujyi wa Kigali wungirije ushinzwe Imiturire n’Ibikorwa remezo Dr. Merard MPABWANAMAGURU wari umushyitsi mukuru  yashimye uburyo abagore n’abakobwa bakoresha neza amahirwe bahawe abasaba kudacika intege Ati “Turashishikariza Abagore gukomeza kugira uruhare mu bikorwa by’Ikoranabuhanga no kubyaza umusaruro amahirwe Igihugu cyacu cyabahaye mu burezi kuri bose, abana b’Abakobwa bakitabira kwiga Ubumenyi Ngiro, Siyansi, Imibare ndetse n’Ikoranabuhanga.”

Umuyobozi w'Umujyi wa Kigali wungirije ushinzwe imiturire n'ibikorwa remezo Dr. Merard MPABWANAMAGURU.

Yavuze ko iterambere ry’abagore n’abakobwa ryagezweho bitewe n’ubuyobozi bwiza burangajwe imbere na Nyakubahwa Perezida wa Repubulika aboneraho gusaba ababyeyi gufasha abana b’abakobwa kwitinyuka kuko byamaze kugaragara ko bashoboye .

Insanganyamatsiko y’uyu mwaka igira iti “Ntawe uhejwe: Guhanga Udushya n’Ikoranabuhanga biteza imbere Uburinganire”. 

Abahagarariye imigoroba y'imiryango bahawe Telefoni zigezweho zo kubafasha .

Abagore n'abagabo bitabiriye umunsi mpuzamahanga w'Umugore