Kuri uyu wa Kane tariki 09 Ukwakira 2025, mu Murenge wa Masaka habereye umuhango wo gutaha ku mugaragaro Urugo Mbonezamikurire y’abana bato rwa Masaka .

Uyu muhango ukaba witabiriwe n’Umuyobozi Nshingwabikorwa w’Akarere ka Kicukiro MUTSINZI Antoine, Umuyobozi mukuru wa Imbuto Foundation Elodie Shami , Umuyobozi mukuru wa Kaminuza ya Mount Kigali , Prof Simon Gicharu ndetse n’Umuyobozi mukuru w’Ikigo gishinzwe imikurire no kurengera umwana (NCDA) Ingabire Assoumpta .

Uru rugo Mbonezamikurire rwubatswe ku bufatanye n’aba bafatanyabikorwa b’Akarere hagamijwe kuzamura ireme ry’uburezi mu bana bato ndetse no guteza imbere Imbonezamikurire yabo.

Umuyobozi Nshingwabikorwa w’Akarere ka Kicukiro MUTSINZI Antoine mu ijambo rye yashimye aba bafatanyabikorwa ku musanzu bakomeje gutanga  mu iterambere ry’uburezi n’uburere bw’abana bato ati “Mfashe uyu mwanya ngo nshimire byimazeyo abafatanyabikorwa bacu, Imbuto Foundation ndetse na Mount Kigali University kuri iki gikorwa tugezeho dufatanyije , guteza imbere gahunda y'Imbonezamikurire y'abana bato ni ukubaka Igihugu kiza cy'ejo hazaza, aha rero ndagira ngo nibutse ababyeyi ko iki Gikorwaremezo dukwiye kukibyaza umusaruro tuzana abana kwiga kugira ngo bakurire mu murongo mwiza Igihugu cyacu kifuza”.

Ababyeyi barerera muri uru rugo Mbonezamikurire bashimye Ubuyobozi bwiza bw’Igihugu bwatekereje kubegereza Urugo Mbonezamikurire rujyanye n’icyerekezo cy’Igihugu bavuga ko mu gihe gito abana bamaze batangiye kwiga bamaze kugaragaza impinduka.

Umuyobozi Nshingwabikorwa w’Akarere ka Kicukiro MUTSINZI Antoine

Umuyobozi mukuru wa Imbuto Foundation Elodie Shami 

Umuyobozi mukuru wa Kaminuza ya Mount Kigali , Prof Simon Gicharu